1) நான் மனிதர்களை வாசிக்கிறேன்…!
1 min read
புத்தகங்களை உணர்ந்து வாசி!
மனிதர்களின் உணர்வுகளை வாசி!
1) நான் மனிதர்களை வாசிக்கிறேன்…!
சமூகம் ஒரு நூலகம்,
மனிதர்கள் திறந்த புத்தகங்கள்.
பல வர்ண முகப்பிலான படைப்புகள்.
சூட்டப்பட்ட பெயர்களாலும் வித்தியாசமானவைகள்.
மனிதர்கள்,
பலதும் பொதிந்த சஞ்சிகை நூல்கள்.
இவற்றின் ஒவ்வொரு அகமும் புது அகங்கள்.
எனவேதான்,
இவை ‘புத்தகங்கள்’
மனிதர்கள்,
இறைவனால் பிண்ணப்பட்ட நூல்கள்.
ஒவ்வொரு நூலும் வெவ்வேறு நூல்கள்.
இறைவன் சொல்கிறான்;
‘நாம் மனிதர்களை,
ஒரு ஆண் ஒரு பெண்ணிலிருந்து படைத்தோம்.
ஒருவரை ஒருவர் புரிந்து கொள்ளவே
கிளைகளாகவும் கோத்திரங்களாகவும் ஆக்கினோம்’
(அல் ஹுஜ்ராத்-13)
அறிதலில் தான் புரிதல் இருக்கிறது.
புரிதல் இன்மைக்கு மனித வாசிப்பு இன்மையே காரணம்.
மனிதர்கள் நூல்களாயின்,
ஒவ்வொரு நூலும்
பக்கங்களால் வரையறுக்கப் படாதவை.
வாசிக்க வாசிக்க
பக்கங்கள் அதிகரிக்கும்
அற்புத நூல்கள் இவை.
வித்தியாசமான,
திக் திருப்பங்கள் கொண்ட வரிகள் ஏராளம்.
வாசிக்கும் போதே
காலம் தரும் திருப்பங்கள் அவை.
திருப்பங்கள் தான் நூல்களை அடையாளங் காட்டும்.
முகமும் முகவரியும் கொடுக்கும்.
இப்புத்தகங்களில்
வாசிக்கப்படாது விட்ட
பக்கங்கள் ஏராளம்;
புரியப்படாது போன
தத்துவங்கள் தாராளம்.
சிலபோது..,
மனிதப் புத்தகங்களை வாசிக்கிறோம்,
கிரகிக்க மறந்துவிடுகிறோம்.
அஞ்சத் தேவையில்லை!
எல்லாப் புத்தகங்களும் நல்ல புத்தகங்கள்.
வாசிப்புகளே புதிய புரிதல்களை ஏற்படுத்துகின்றன.
புரிதல்கள்,
உறவுகளை வடிவமைக்கின்றன.
ஊடாட்டத்தை ஒழுங்குபடுத்துகின்றன.
மனிதப் புத்தகங்களை
கிரகித்து வாசி!
ஏனெனில்..,
நீ மனிதக் கிரக வாசி!
மனிதர்களை நீ வாசித்தால்..,
நிச்சயமாய் நீ,
நடமாடும் கலைக்களஞ்சியமாவாய்,
நீ மற்றவர்களால் வாசிக்கப்படுவாய்..!
நீ மெய்ஞானியாக
வேண்டுமானால்
மனிதர்களை வாசி!
நீ மெய் ஞானியாக
வேண்டுமானாலும்
மனிதர்களை வாசி!
நீ மனிதர்களை வாசிக்க வாசிக்க
மக்களின் மனவாசி ஆகிவிடுகிறாய்..!
இஸ்பஹான் சாப்தீன்
2011.01.02
